منتديات موقع الميزان

منتديات موقع الميزان (http://www.mezan.net/vb/index.php)
-   ميزان المنبر الحسيني لشعر أهل البيت (ع) (http://www.mezan.net/vb/forumdisplay.php?f=157)
-   -   زماني شكد قسه بزينب زماني-بجمر فكدك يبو الحمله جواني (http://www.mezan.net/vb/showthread.php?t=37506)

h........m 28-Jun-2016 01:13 AM

زماني شكد قسه بزينب زماني-بجمر فكدك يبو الحمله جواني
 

زماني شكد قسه بزينب زماني
بجمر فكدك يبو الحمله جواني
دمع يهمل شكثر احمل على اغيابك
ــــــــــــــــــــــــــــــــــــــــــــ
يحيدر دمعتي اعله الخد لمن اتطيح
علي يابويه لا تتركني احسها اتصيح
انه اخلافك مثل ريشه ابمهب الريح
انه ابنيتك علي ترضه دمعتي اتسيح
مضن ترضه الدمع يهمل على الوجنه
ولا ترضه بكلب زينب يون ونه
لون تدري الدمع يجري على اغيابك
ــــــــــــــــــــــــــــــــــــــــــــ
يتيمه من ابقه من دونك يبو الحسنين
اذا شده بدليلي وين اروحن وين
شتضن يطفي جمر كلبي دمع هالعين
الجمر والدمعه يا بويه صفن نارين
يتيمه وياعلي ايبجي الصخر حالي
صدك ترضاهه ابقه وما الي والي
اخوتي تنوح بدمع مسفوح على اغيابك
ــــــــــــــــــــــــــــــــــــــــــــ
قسه وياي الزمن يابويه من زغري
وعلي يرمي سهام النايبه دهري
انه ابفكد الحنينه امي انكسر ضهري
يبويه ومن رحت صحت انذبح عمري
بعد ما تسوه دنياتي ولا ايامي
اكضي ليلي يابويه بجفن دامي
ذبل حيلي اسهرت ليلي على اغيابك
ــــــــــــــــــــــــــــــــــــــــــــ
شكثر احمل بعد من ضيم يا حيدر
كلب مو صخره عندي وشتضن اكدر
يبويه وكلبي من النايبه اتفطر
اكابر عل وضع من ضيمي واتصبر
يبويه لا تضن ينشف دمع عيني
انه الما حسبت وحدي تخليني
الكلب مهظوم تركت النوم على اغيابك
ــــــــــــــــــــــــــــــــــــــــــــ
زماني ما رحم بيه وهتك حيلي
نهاري كمت اشوفنه مثل ليلي
حملت اشجم سهم صاب الكلب ويلي
يريته وي رحيلك اصبح ارحيلي
يريت انه انطبر راسي ودماي السال
ولا ابقه يبو الحمله بأمر الحال
الدمع هالي انشده بالي على اغيابك

الشاعر محمد حسن ضيغم


الساعة الآن »08:24 PM.

المواضيع والمشاركات التي تطرح في منتديات موقع الميزان لا تعبر عن رأي المنتدى وإنما تعبر عن رأي كاتبيها فقط
إدارة موقع الميزان
Powered by vBulletin Copyright © 2017 vBulletin Solutions, Inc