ابن امي واعرف ريحته من دمه
لحسيـن اجـيـت ارد انـعـاه
انهار الحـزن اگضـي اويـاه
_________________
اربعينك صار يومه وجبت من الشام ظعنـي
خويه جمر امصاب فگدك بالگلب كلسا لسعني
للظعن ناديت گومو اشعجب چا محد سمعنـي
چا وين امـي فاطمـه - - -چا وين حماي الحمـه
شو بس رماد وهالدمه- - -وشوفت الدم هم فجعني
وذاك المهد محروگ اشوفه اگبالي
چاوينه عبد الله المهد شو خالـي
بالمهـد يـاريـت الگاه- - -انهار الحزن اگضي اوياه
_________________
بالمهد عبد الله عفته والسهم گاطـع وريـده
ميت اوما غمض عينه امن الگماط امطلع ايده
واجت ويه الظعن أمه للطفـل منـي تريـده
تنوح وبچاها ينسمـع- - -ابني اريده اليرتضـع
گتلها وبعيني الدمـع- - -حسين اخذ وياه اوليده
ويه الحسين الطفل صار ابگبره
شابگ ابوه ظلت النبله ابنحره
صاحـت الأم واويـلاها- - -نهار الحزن اگضي اوياه
_________________
هوه موبس الرضيع وامه چي تهمل دمعهـا
هاي رمله على القاسم بيدها لزمت ضلعهـا
يبني يبني اتصيح يبني بچّه كل سامع سمعها
عفرت گبره ابحنتـه- - -گعدت اوعلگت شمعته
يالمـا تهّنـه نادتـه- - -اغيابك لأمك فجعهـا
ما اروح يبني راح اظلن يمـك
وخلي النياحه والحزن بس لمك
ام لـلأبـن ماتنـسـاه- - -انهار الحزن اگضي اوياه
شلون ام تنسه ولدها وهاي ليله تنعه الاكبر
هوّت بالممشه وجدمها اتنگله ماتگدر تعثر
خدها فوگ اتراب گبره وبالتراب الخد تعفر
طاحت على اتراب الگبر- - -نادته يوليـدي العمـر
مايسوه عگبك شصطبر- - -وگلبي لمصابـك تفطـر
يالاكبر امك شوف يبني اشبيها
دمعتها يبست بالجفن تاذيهـا
يالحـد صـاحـت واراه- - -انهار الحزن اگضي اوياه
_________________
وانه يحسين العقيلـه گلبـي مابطـل انينـه
ارد اروح الگمر هاشم ارد اشوفن گبره وينه
واخذ اويايه الوعدها ومارجع ليها اسكينـه
عالماي لمن كلفتـه- - -للنهر راح ابرايتـه
العمها بعد ماشافته- - -وظلت اخلافه حزينه
رجعت حزينه امن اليسر بالآلام
عافت رقيه خويه ميته بالشـام
ظعنـك دگوم اتــلگاه- - -انهار الحزن اگضي اوياه
_________________
هاي لوعات الچبود اللي اجت يحسيـن تنعـه
شلون من عگب اربعينك هالظعن گلي شيرجعه
يردن ايظلن يخويه وگلـب مفجـوع شيقنعـه
وحده بگت يم الابـن- - -وعله الأبو وحده تون
عاليرتضع امه تحـن- - -من دمه ايهلّن الدمعه
حيرّني يحسين اشأصبـر يـاروح
كل گلب ينزف قهر خويه اومجروح
چم طفـل حيرنـي ابچاها- - -نهار الحزن اگضي اوياه