[ياعلي مدد]

ياباب فاطمه

يا كرار بالشدة طحنه - يا كرار أولادك إحنه

يا حيدر ناحت العترة- لمصيبة فاطمة الزهرة
الحسن شبلك جذب حسرة - على ضلع الطاهرة وكسره
والحسين إنشحن صدره - بلهيب النايبة الكبرى
ينادوك مظلم صبحنه - يا كرار أولادك إحنه

وعلي السجاد يا حيدر - على فگد الزهرة يتحسر
وضمير الباقر تأثر - على حزنك ناره تتسجر
كيان الصادق تكدر - ويتبعه موسى بن جعفر
يواسوك والمحنة محنه - يا كرار أولادك إحنه

ينوح الكاظم بسجنه - على الزهرة يجر ونة
الرضا بدار الغرب لنه - يواسيك بجمر حزنه
يا حيدر والجواد إبنه - إرتفع صوت الحزن منه
بالهموم ينزف جرحنه - يا كرار أولادك إحنه

وعلي الهادي بگلب صادي - ينوح لبضعة الهادي
بمصيبة فاطمة ينادي - يا جد صار الحزن زادي
الدمع عالخد حفر وادي - على وجه العسكري يبادي
الحسن صاح مدمع سفحنه - يا كرار أولادك إحنه

يا حيدر شنوا الغارة - بحقدهم سجروا ناره
سليلك شاعت أخباره - يسل المهدي بتاره
يصب للزهرة أعباره - وضلعها يطالب بثاره
على الثار كل إحنا صحنه - يا كرار أولادك إحنه


آه يا لهفة غيابي وحنيني وحسرة الحسرة
نفذ سم القهر يا جد لمصيبة جدتي الزهرة
حرت بين الضلع والراس وبين الكسر والطبرة
ضلع أمي ودمك يا جدي - هالثارين بيا ثار أبدي
بمصابي هبطت راسي ذكرت دم راسك إليجري
من أذكر ضلع أمي تنوح ضلوع إلي بصدري
گبرها ضايع ويا ريت ضايع يا علي گبري
حتى السيف يصب الدمعة - ويصرخ آه يا ثار البضعة
سيفك ذو الفقار وياي يترقب حلول الثار
وبگايا دمك بعيني تصب يا جد يا حامي الجار
وبعد عندي جرح نازف مسيله يعود للبسمار
تواسيك عيوني بعبرتها - لمصاب الزهرة ولوعتها