[صفوان بيضون]

قصة عشق

بيني وبينن في سحرْ
والقصة مو قصة شعر
ولاهي خطابة أو نثر
ولا هي حكايا للنشر

من يوم كوني صبي
ويمكن قبل ، حتماً قبل
قبل الخلايق والخلق
قلبي تولع بالنبي
وتعلق بآل النبي
والقصة تاريها عشق
وبالقلب محفورة حفر
+++++++++++
حمّلت أشعاري حكي
عا قد ما بتقدر حمل
ودوزنتها سطر بسطر
رجعت عليي تشتكي
مو قادره عا هتقل
قلتلها هدا النبي
وبيت النبي ، وهني الأصل
أصل الخليقة والخلق
والحكي عنن مو لعب
والحكي محتاج لفعل
والفعل محتاج لصدق
والحكي من غير العشق
بيضل عحدود الثغر
ما بيدخل عروق القلب
والقصة مو قصة حكي
إما هدى ، وإما كفر .
+++++++++++
بين الحزن والفرفشه
بين الموالد والعزا
قصة ولاية مزركشه
بورود مليانة شزا

وردة محمد يا سلام
صلوا على خير الأنام

ووردة علي ما لا متل
وردة علي هيي الأصل

وأم الحسن ست الورود
عطرا بيزين هالوجود

ووردة حسن ، كلها شجن

وحسين ورداتو حمر
بالدم عم تقطر قطر

ومن بعهدهن تماني الزهر
تلاتي علي ومحمدين
وجعفر وموسى والحسن
وردات عطشها الزمن
يلي انقتل ويلي انسجن
لك آخ من هدا الزمن
يلي قصف عمر الورد
+++++++++++
قلي الورد لسا بعد
انسيت الوعد ، انسيت العهد ؟
معقول انس هالأمر !
ما انسيت هالسرداب
والعطر منو غاب
والقلب والله داب
عم ينتظر ضو الفجر
تا يطلع ويمحي القهر
بئيدو بيارق هالنصر
ويظبط أمور الدهر
ويعم عطروا عالدنيي
أحلى عطر ، أجمل عطر ...

المقطع الآخير :

شفت القمر سهران
بنص الشهر مو بدر
مضايق وحيران
ومعصب من القهر
سألتو شبك ما رد
والدمع ملا الخد
تاري القمر زعلان
والمسألة عن جد
+++++++++++
عدت السؤال بود
يا قمير لا تنغم
وان كان سر كبير
والسر بدو بير
صدري غميق كتير
وهالبير مالو حد
احكيلي ولا تهتم
+++++++++++
شفتو هدي وارتاح
والهم شقفه انزاح
+++++++++++
قلي مرق خيال
أسمر عخدو خال
سيفو برق بالغمد
والبرق شق الليل
وانهد مني الحيل
واتغيرت أحوال
ومن بعد شوفت حال
الضو صار خيال
والبدر صار هلال
+++++++++++
قلتلو هدا المير
مير الأرض والجو
مير البحر والنو
والمير عندو جنود
منها ملايكة السما
منها البرق و الرعد
وجنود ما بتنعد
بئيدو المحي والخط
بئيدو الرفع والحط
ولي بيشوف المير
بيكون شاف السعد
بيشوف ليلة قدر
+++++++++++
واليوم يوم العيد
سمعوني هالزغريد
ما في حدا نعسان
ليكوا القمر سهران
عم يرقص وفرحان
بالنص من شعبان
واليوم يوم العيد
سمعوني هالزغريد ....