[خادمة المرتضى]

بسم الله الرحمن الرحيم
اللهم صل على فاطمة وأبيها وبعلها وبنيها والسر المستودع فيها
والحمد لله رب العالمين والصلاة والسلام على سيدنا محمد وآله الطيبين الطاهرين
ولعنة الله على أعدائهم أجمعين

.: الجزء السادس عشر؛ دفن الأمام الحسين :.

« استنهاض بني هاشم »

يَـولاد هـاشم مـا بـقت مـنكُم بـقيّه ... راحــت حـرايركم يـسر بـالغاضريّه

بـالغاضريّه اتـيسّرت ثـوروا ادركوها ... هــذي الـعدا لـلشّام مـسبيّه خـذوها
و شـيخ الـعشيره اجـنازته ما شيّعوها ... فــوق الـتّـرايب شـيّعتها الاعـوجيّه

و عـبّاس يـم الـمشرعه مقطوع لزنود ... وعـدوانكم نـكّسوا الرّايه ومزّقوا الجود
مـحّد رفـع جـسمه وظل بالتّرب ممدود ... ضـاعت عـقب عـينه الحريم الهاشميّه

و شـبّانكم جـاسم و لَـكبر بالثّرى انيام ... كـلـهم بــلا تـجهيز ظـلّوا ثـلثتيّام
و عـدوانكم سـاقوا الـظّعينه ابذيج لَيتام ... حـسّر عـلى نـوق و مـدامعها جـريّه

راحـت حـرايركم يسر يا اشبال عدنان ... فـوق الـهوازل و التسوق الظّعن عدوان
قـطعت فيافي وراس عزها يلوح بسنان ... يـسطع عـلى الذّابل مثل شمس المضيّه

الـكم يـتامى تـقطع الـبيدا عـلى نوق ... ومـخدّره اتـنخّي الحادي ابدمع مدفوق
اتـقلّه يـحادي النّوق هزّل خفّف السّوق ... شـوف الـيتامى اتـلوج مـاعندك حميّه

الـكم عـليل امـدامعه جـرحت اخدوده ... وابـجامعه و اغـلال مـشدوده ازنوده
فـوق الـهزيله جـرّحت سـاقه اقـيوده ... كـلـما يـضربونه يـون ونّـه خـفيّه

« استنهاض الأسديات رجالهن للدفن »

قـلّت شِـيَمكم و الـحميّه يـا مـسلمين ... ويـن الـذي يـنهض يواري هالمطاعين

لـبسوا مـقانعنا و تـخفّوا خـلف لستور ... واحـنا ابـعَمَايمكم نروح و نحفر اقبور
نـدفن هَـلَجساد الـذي بـالمعركة اتنور ... مـثل لـبدور اعْلى الثّرى كلهم مزهرين

رحـنا قـصدنا الـمشرعه وجينا المعاره ... وشـفنا جـسد مرضوض واتْرَكنا حياره
أوصـاله كـلها امـقطّعه و تسطع انواره ... مـقطوع حـتى خنصره من جفّ اليمين

بالشّمس مرمي عْلَى الثرى عريان مسلوب ... وقـلب الـعدو مـن شوفته ينْفَت ويذوب
مـطعون باضلاعه وقلبه ابسهم مصيوب ... يـمّه رضـيعه ونـظن هذي جثّة حسين

و يـمّه ولـد مـثل الـبدر جسمه ايتلالا ... وكـثر الـطّعن والضّرب ما غيّر جماله
مـا تنحصى اجروحه امقنطر على شماله ... الله يـسـاعد قـلـبها الـفقدت هـلثنين

وشـفنا شباب اعْلَى الثّرى جفوفه خضيبه ... عـرّيس جـنّه و زفّـته الـذبحه قريبه
الله يـعـين الـفقدته و راحـت غـريبه ... مـاظنّتي بـين الـذّبح والـعرس يومين

جـثّـه بـليّا راس ويّـا جـملة ابـطال ... كـلهم عـرايا امجزّرين اليوث و اشبال
شـبّان و اكـهول و بـعد و يّاهم اطفال ... بـسهام مـذبوحه اشـعظمها فجعة البين

و فـتّت مـرايرنا بـطل يـم الـشّريعه ... مـصـروع لـكن ذبـحته والله فـجيعه
حـتّـى مـن الـزّندين جـفّينه قـطيعه ... صـاحب عـلَم جـنّه و سـلالة هاشميّه

مـن شـوفته اتلوح الفراسه و شدّة الباس ... ازنـوده بـليّا اجفوف و الجثّه بلا راس
و انْـظن عـليه الفارس المشهور عبّاس ... قـطعوا عـلى جوده العدا اشماله و ليمين

«حضور السجاد لدفن الحسين »

عـلّة وجـود الـكون جسمه بذيج لَوعار ... عـاري ولا لـه غـير وحش البر زوّار

مـرمـي ثـلثتيّام لا تْـجَهَّز ولا انـشال ... رَدْ لـه عـليله ابقلب واهي ودمع همّال
و بـس عاينه فوق الوطيّه افراشه ارمال ... والـجسد مـاينشال حـن و ظـل محتار

كـلما رفـع جـانب توزّع جانب و طاح ... مـن حيث جسمه اموزّعينه بطعن لرْماح
خـلّى الجسد وانـهل دمعه وبالوجد صاح ... يـابوي جـيف نْشيل جسمك يَبْن لَطْهار

حـيّرتني بـيش اجـمع أوصالك يَمَبرور ... هـذي لـجفوف امقطّعه والصّدر مكسور
وبين الجسد والرّاس يَبن المصطفى ابرور ... هـذا الـجسد و الـرّاس يتْشَهَّر بلَمصار

جـابوا لـه قـطعة باريه وجمّع أوصاله ... ولـفّه عـسى عـيني العما ودنّق وشاله
وحـطّه وسط قبره وتخوصر وانحنى له ... وشـمّه بـنحره والـضّماير تسعر بنار

انـهدّت اركـانه ويل قلبي وجذب حسره ... اتـحنّت اضـلوعه يوم هال اتراب قبره
صـاح انـكسر قـلبي وراح اللّي يجبره ... امـصاب الجرى عليه بكل الدّهر ماصار

لـقْضي يـبويه بـالبجا لـيلي و نهاري ... غـيـرك مَـشِفْنه مـجفّنينه بـالبواري
مـن عـقب مـا تـبقى ثـلثتيّام عاري ... فـوق الـثّرى وسترك يبويه ابهَلفلا غبار

يـا قـوم هـالعِدْ رجل ابويه حسين لَكبر ... هـذا الـذي مـن شـوفته قـلبي تفطّر
هـذا الـشّباب الـلي عـلى الدّنيا تحسّر ... هـذا الـذي خـلّى الـشّهيد ايدير لَفكار

و هـذي لَـجساد الـلي اندفنوا ابهلحفيره ... مـن بـيت واحـد كلهم وكلهم عشيره
كـل فـرد مـنهم بالخلق ما مِشْ نظيره ... شـبّان كـلهم مـن سهمهم قصر لَعمار

« رجوع السجاد بعد الدفن »

قـلبي شـعبته ابـغيبتك يـخْليفة حسين ... واظـلم نـهاري ومرمرت حالي النساوين

غـيبتك يَـبني هـيّجت حـزني عـليّه ... ابـهالمرض جـاي امـنين يا باقي البقيّه
قـلـها يَـعمّه جـيّتي مـن الـغاضريّه ... واريـت اخـوتي ودْفنت عبّاس وحسين

واريـت ابويه و جيت بالحسره و لهموم ... والله يَـعمّه امـن العوادي الجسد محطوم
و الـجفن سـافي التّرب و امغسّل بلدموم ... ذاك الـعزيز انـدفن جسمه ابغير تجفين

قـالت دفـنت اهـلك يَـبَعد اهلي يَسَجّاد ... روس اُوجـثَثْ واريـتهم لـو بَس لَجساد
قـلها يـعمّه الـرّوس طـرّشها ابن زياد ... لـيزيد واحـنا من بعدهم غصب ماشين

مـاحد تدنّى امن الخلق شق الهم ارموس ... غـيّر مـحاسنهم يَـعمّه حـر لـشموس
و ادفـنتهم كـلهم يـمحزونه بـلا روس ... وامّـا الـبطل عـبّاس لا راسٍ ولا ايدين

ولـيلى تـنادي ذاب قـلبي يَبْن الامجاد ... بالله دخـبّر عـن عـضيدك شـيخ لَولاد
ذاك الـجمال اشْـحَل عليه من حر لوهاد ... قـلها يَـليلى عـن عـزيزج لا تسئلين

لا تـسأليني عـن عـلي حـاله شَعَبني ... بَـس عـاينت حالة عضيدي انهد ركني
سـجّيت جـثْته بْـحُفْرته و ازداد حزني ... و كـلما شِـفِت طوله ابقبره هِملَت العين

وكـل ام ولـد فـرّت تـسايل عن ابنها ... ورمـله تـهل الـدّمع و تصيح ابغبنها
الـعرّيس قـلّي اجـنازته يـاهو دفـنها ... الله يَـقَلبي اشـتحتمل مـن فـجعة البين

قـلها انـكسرتي و الـكسر ربِّـج يجبره ... الـعرّيس بـيدي نـزّلت جـثته ابـقبره
ويـاه اخـوته امـوسّدين ابـفرد حـفره ... و قلبي انصدع من شوفته مخضّب الجفّين

وجتّه الرّباب تصيح قلبي من الوجد ذاب ... بالله ارد انـشدك يـالذي واريـت لَحباب
عـن نور عيني حسين قبل اتهيل لتراب ... شِـلْت الـنّبل عـنّه و نزَّلْت الجسد زين

ابـيا حـال شِفْت اجسادهم يا نور عيني ... قـلها ابـعرا قـالت أنـشدك عن جنيني
شِـفْته ابـعينك قـال بَـسْ لا تشعبيني ... واريـت عـبدالله الرّضيع ابحفرة حسين

صـاحت يـبو محمَّد ترى حجيك شعبني ... بـصدر الـشّهيد حسين جيف اموسّد ابني
يـا لـيت ذاك الـقبر ويّـاهم يـضمني ... وشـلّي ابـحياتي نغّصوا عيشي هلثنين

يتبع »»

والسلام عليكم ورحمة الله وبركاته
نسألكم الدعاء